Hiva ʻa Solomone 5
1 ʻE hoku tuofefine mo hoku uaifi, kuo u haʻu ki heʻeku ngoue: kuo u tānaki ʻa ʻeku mula, mo ʻeku kakala; kuo u kai ʻa ʻeku hone pea mo hono ngeʻesi; kuo u inu ʻi heʻeku uaine mo ʻeku huʻahuhu: ʻE hoku kāinga, ke tau kai, pea inu, ʻio, ke inu lahi ʻakimoutolu ʻoku ou ʻofa ai.
2 ʻOku ou mohe, ka ʻoku ʻā hoku loto: ko e leʻo ia ʻo hoku ʻofaʻanga, ʻoku ne tukituki, ʻo ne pehē, “ʻE hoku tuofefine, mo hoku ʻofaʻanga, ko ʻeku lupe, ko ʻeku haohaoa, toʻo kiate au: he kuo pito hoku ʻulu ʻi he hahau, mo hoku louʻulu ʻi he viviku ʻoe poʻuli.
3 Kuo u toʻo hoku kofutuʻa; pea ʻe fēfē haʻaku toe ʻai ia? Kuo u fufulu hoku vaʻe, pea ʻe fēfē haʻaku toe ʻuliʻi ia?
4 Naʻe ʻai mai ʻae nima ʻo hoku ʻofaʻanga ʻi he kātupa, pea naʻe ngaue hoku loto kiate ia.
5 Ne u tuʻu hake ke toʻo ki hoku ʻofaʻanga; pea naʻe toʻi mei hoku nima ʻae mula, pea mei hoku louhiʻi nima ʻae mula namu lelei, pea tafe hifo ia ki he toʻoʻanga matapā.
6 Naʻaku toʻo ki hoku ʻofaʻanga; ka kuo tafoki atu ʻa hoku ʻofaʻanga, ʻo ne ʻalu: naʻe vaivai ʻa hoku loto ʻi heʻene lea mai: ne u kumi kiate ia, ka naʻe ʻikai te u maʻu ia; ne u ui ki ai, ka naʻe ʻikai te ne tali au.
7 Pea naʻe ʻiloʻi au ʻe he kau leʻo naʻe feʻaluʻaki ʻi he kolo, ʻonau taaʻi au, pea u lavea ai; pea naʻe toʻo ʻa hoku pūlou ʻe he kau leʻohi ʻoe ʻā.
8 ʻE ngaahi ʻofefine ʻo Selūsalema, ʻoku ou fekau kiate kimoutolu, ʻoka mou ka ʻilo ʻa hoku ʻofaʻanga, ke mou tala ki ai ʻoku ou pongia ʻi he ʻofa.
9 Ko e hā hono lelei hake ʻo ho ʻofaʻanga ʻi he ʻofaʻanga ʻo ha taha kehe, ʻa koe ʻoku fungani hoihoifua ʻi he kakai fefine? ko e hā hono lelei hake ʻo ho ʻofaʻanga ʻi he ʻofaʻanga ʻo ha taha kehe, koeʻuhi kuo ke fekau pehē ai kiate kimautolu.
10 ʻOku hinehina mo nganongano ʻa hoku ʻofaʻanga, ko e fungani toulekeleka ia ʻi ha toko mano.
11 ʻOku tatau mo e fungani koula lelei ʻa hono ʻulu, ʻoku fafatu hono louʻulu, pea ʻuliʻuli ʻo hangē ko e leveni.
12 ʻOku lelei ʻae ʻaiʻanga ʻo hono kanoʻi mata, pea ʻoku hangē ko e mata ʻoe lupe ʻi he veʻe vaitafe kuo fufulu ʻaki ʻae huʻahuhu.
13 ʻOku tatau hono kouʻahe mo e tokanga ngoue ʻoe ngaahi kakala; ʻo hangē ko e ngaahi matalaʻi kakala: ʻoku hangē ko e lile ʻa hono loungutu, ʻoku toʻi mei ai ʻae mula namu kakala.
14 ʻOku tatau hono nima mo e ngaahi mama koula kuo ʻai ki ai ʻae pelili, mo hono sino ʻoku hangē ko e lei ngingila kuo ʻaofi ʻaki ʻae safaia.
15 ʻOku tatau hono vaʻe mo e pou maka lelei, kuo fokotuʻu ki he tuʻunga koula: ʻoku hangē ko Lepanoni ʻa hono fofonga, ʻo tatau mo e ngaahi sita ʻa hono lelei.
16 ʻOku melie lahi hono ngutu: ʻio, ʻoku toulekeleka kotoa pē ia. Ko hoku ʻofaʻanga eni, pea ko hoku kāinga ia, ʻE ngaahi ʻofefine ʻo Selūsalema.
Ngaahi fetuʻutaki veesi
120
- 1Sng 6:2, Sng 4:16, Rev 22:17, Sng 4:9–14, Sng 8:13, Isa 55:1–2, Pro 9:5, Isa 58:11
- 2Rev 3:20, Sng 2:14, Zec 4:1, Sng 6:9, Psa 119:1, Psa 24:7–10, Sng 4:9, Gen 31:40–41
- 3Luk 11:7, Pro 13:4, Pro 3:28, Mat 25:5, Mat 26:38–43, Pro 22:13, Rom 7:22–23
- 4Act 16:14, Php 2:13, 2Co 8:1–2, Gen 43:30, Sng 1:4, Psa 110:3, 2Co 8:16, 1Ki 3:26
- 5Sng 5:13, Eph 3:17, Sng 3:6, Sng 5:2, 2Co 7:9–11, 2Co 7:7, Rev 3:20, Luk 12:36
- 6Sng 5:2, Rev 3:19, Hos 5:15, Psa 80:4, Sng 6:1, Psa 28:1, Luk 22:61–62, Lam 3:8
- 7Sng 3:3, Act 5:40–41, Mat 23:29–36, 2Co 11:13, Isa 6:10–11, Mat 21:33–41, Mat 23:2, Heb 12:2
- 8Sng 2:7, Sng 2:5, Psa 42:1–3, Sng 3:5, Psa 119:81–83, Rom 15:30, Gal 6:1–2, Psa 63:1–3
- 9Sng 1:8, Sng 6:1, Sng 6:9–10, Psa 87:3, Mat 16:13–17, Isa 53:2, Psa 45:13, Jhn 1:14
- 10Psa 45:2, Php 2:9–11, Psa 45:17, Sng 2:1, 1Sa 16:12, Heb 2:10, Deu 32:31, Heb 7:26
- 11Sng 5:2, Dan 7:9, Sng 7:5, Eph 1:21–22, Rev 1:14, Dan 2:37–38
- 12Sng 1:15, Sng 4:1, Heb 4:13
- 13Sng 1:10, Sng 6:2, Sng 2:1, Psa 45:2, Sng 3:6, Sng 4:11, Isa 50:6, Luk 4:22
- 14Exo 24:10, Isa 54:11, Sng 7:2, Psa 99:4, Ezk 1:16, Exo 15:6, Exo 28:20, Isa 52:13
- 151Ki 4:33, Rev 1:15–16, Hos 14:7, Exo 26:19, Mat 17:2, Act 2:28, Sng 2:14, Zec 9:17
- 16Psa 45:2, Sng 7:9, Sng 2:3, Jas 2:23, Hos 3:1, Psa 119:103, Jas 4:4, Gal 2:20