Rahab

Rahab, (Heb. Rahab; sa makatuwid baga'y, “malapad,” “malaki”). Nang ang mga Hebreo ay nagkakampamento sa Sittim, sa “Araba” o libis ng Jordan sa tapat ng Jerico, na handa nang tumawid sa ilog, si Josue, bilang huling paghahanda, ay nagsugo ng dalawang tiktik upang “tiktikan ang lupain.” Pagkaraan ng limang araw ay nagsibalik sila, matapos lumangoy sa ilog, na sa panahong yaon, ang buwan ng Abib, ay umaapaw sa mga pangpang nito dahil sa pagkatunaw ng niebe sa Libano. Isinaysay ng mga tiktik kung ano ang sinapit nila (Jos. 2:1-7). Sila'y nalagay sa panganib sa Jerico, at sila'y iniligtas ng katapatan ni Rahab na patutot, na sa kaniyang bahay sila napasa upang magkanlong. Nang bumagsak ang bayan ng Jerico (6:17-25), si Rahab at ang kaniyang buong sangbahayan ay iningatan ayon sa pangako ng mga tiktik, at sila'y ibinilang sa gitna ng bayang Judio. Siya'y naging asawa nang dakong huli ni Salmon, na isang prinsipe ng lipi ni Juda (Ruth 4:21; 1 Cron. 2:11; Mat. 1:5). “Ang paghiling kay Rahab na ilabas ang mga tiktik sa mga kawal (Jos. 2:3) na ipinasundo sa kanila, ay lubos na naaayon sa mga kaugalian sa Silangan, na hindi nagpapahintulot sa sinomang lalake na pumasok sa bahay ng isang babae nang walang pahintulot nito. Ang bagay na tinakpan niya ang mga tiktik ng mga bigkis ng lino na nakalagay sa bubungan ng kaniyang bahay (2:6) ay isang ‘di-sinasadyang pagkakatugma’ na mahigpit na nagpapatibay sa salaysay. Panahon noon ng pag-aani ng sebada, at ang lino at ang sebada ay sabay na nahihinog sa libis ng Jordan, kaya't maaasahang ang mga bigkis ng tangkay ng lino ay natutuyo noon” (Geikie's Hours, atbp., ii., 390).