Joash

Mwana wa Mfalme Ahazia. Alipokuwa bado mchanga, aliokolewa kutoka katika mauaji makuu ya jamaa yake na shangazi yake Yehosheba, na yaonekana alikuwa mzao pekee wa Sulemani aliyesalia (2 Nya. 21:4, 17). Mjomba wake, kuhani mkuu Yehoyada, alimtoa hadharani alipokuwa na umri wa miaka minane, akamvika taji na kumtia mafuta awe mfalme wa Yuda kwa sherehe za kawaida. Athalia alishtukizwa aliposikia kelele za watu, “Mfalme na aishi;” na alipotokea hekaluni, Yehoyada akaamuru atolewe nje auawe (2 Fal. 11:13-20). Kuhani mkuu alipokuwa hai, Yehoashi aliipendelea ibada ya Mungu na kuishika sheria; lakini baada ya kufa kwake akageukia njia mbaya, na nchi ikanajisiwa kwa ibada ya sanamu. Zekaria, mwana na mrithi wa kuhani mkuu, aliuawa. Matendo haya maovu yaliileta juu ya nchi hukumu ya Mungu, nayo ikaonewa na wavamizi Washami. Yeye ni mmoja wa wafalme watatu walioachwa na Mathayo (1:8) katika ukoo wa Kristo, wale wengine wawili wakiwa Ahazia na Amazia. Alizikwa katika mji wa Daudi (2 Fal. 12:21).