Umakyat si Zaqueo sa Puno

Dumating si Jesus sa bayan ng Jerico. Sa bayang iyon nakatira ang isang lalaking nagngangalang Zaqueo. Siya ay isang punong maniningil ng buwis, at mayaman siya. Gustong-gusto ni Zaqueo na makita si Jesus. Ngunit napakaraming tao, at si Zaqueo ay pandak. Hindi siya makakita sa ibabaw ng mga ulo ng mga tao.

Kaya tumakbo si Zaqueo nang pauna. Umakyat siya sa isang puno ng sikamoro, dahil doon daraan si Jesus. Ngayon, nakakakita na siya!

Nang dumating si Jesus sa puno, tumingala siya. Nakita niya si Zaqueo at sinabi, "Zaqueo, magmadali ka at bumaba. Ngayon ay kailangan kong tumuloy sa bahay mo." Nagmamadaling bumaba si Zaqueo nang pinakamabilis na kaya niya at buong galak na tinanggap si Jesus.

Ngunit nagbulung-bulungan ang mga tao. "Nakituloy si Jesus sa bahay ng isang makasalanan," sabi nila.

Pagkatapos, tumayo si Zaqueo at sinabi sa Panginoon, "Tingnan po ninyo, Panginoon! Ibibigay ko ang kalahati ng lahat ng aking ari-arian sa mga mahihirap. At kung may nakuha akong pera mula kaninuman nang hindi tama, isasauli ko ito nang apat na ulit."

Sinabi ni Jesus, "Ngayon, dumating ang kaligtasan sa bahay na ito. Sapagkat ang Anak ng Tao ay naparito upang hanapin at iligtas ang nawawala."