Mahal ni Jesus ang mga Bata

Naglalakbay si Jesus sa lupain ng Judea. Saan man siya magpunta, dumarating sa kanya ang mga pulutong ng tao, at tinuturuan niya sila, gaya ng lagi niyang ginagawa.

Isang araw, dinala ng mga tao ang kanilang maliliit na anak kay Jesus. Gusto nilang hipuin sila ni Jesus at basbasan.

Ngunit pinagalitan ng mga alagad ni Jesus ang mga taong nagdala ng mga bata. Sinubukan nilang paalisin ang mga ito.

Nang makita ito ni Jesus, hindi siya natuwa. Sinabi niya sa kanyang mga alagad, "Hayaan ninyong lumapit sa akin ang maliliit na bata. Huwag ninyo silang pigilan! Sapagkat ang kaharian ng Diyos ay para sa mga katulad nila."

Pagkatapos, may sinabi si Jesus na kahanga-hanga. "Sinasabi ko sa inyo ang totoo: ang sinumang hindi tumanggap sa kaharian ng Diyos na gaya ng isang maliit na bata ay hindi makapapasok dito." May matututuhan pala ang mga matatanda mula sa mga bata!

At kinalong ni Jesus ang mga bata. Ipinatong niya ang kanyang mga kamay sa kanila, at binasbasan niya sila, isa-isa.