Pinakain ng Diyos si Elias

Si Elias ay propeta ng Diyos. Sinabi niya kay Haring Acab, "Habang buhay ang Panginoong Diyos ng Israel, walang ulan o hamog sa loob ng mga taon, hanggang sa sabihin ko." At tumigil ang ulan.

Sinabi ng Diyos kay Elias, "Pumunta ka at magtago sa tabi ng batis ng Kerit. Maaari kang uminom mula sa batis, at inutusan Ko ang mga uwak na pakainin ka roon." Pumunta si Elias. Umaga at gabi, lumilipad ang mga uwak papunta sa kanya na may dalang tinapay at karne, at umiinom siya mula sa batis.

Hindi nagtagal, natuyo ang batis, dahil walang ulan. Pagkatapos, sinabi ng Diyos, "Pumunta ka sa bayan ng Sarepta. Sinabihan Ko ang isang biyuda roon na pakainin ka."

Sa pintuan ng bayan, nakita ni Elias ang biyudang namumulot ng mga patpat. Humingi siya rito ng tubig at kaunting tinapay. Sinabi ng biyuda, "Mayroon lamang akong isang dakot ng harina at kaunting langis — isang huling pagkain para sa amin ng aking anak." Sinabi ni Elias, "Huwag kang matakot. Igawa mo muna ako ng isang maliit na tinapay. Sinasabi ng Panginoong Diyos ng Israel na hindi mauubos ang iyong harina at langis hanggang sa muli Niyang padalhan ng ulan."

Ginawa niya ang sinabi ni Elias, at totoo nga! Kumain siya at ang kanyang anak at si Elias sa loob ng maraming araw. Hindi kailanman naubos ang harina at ang langis.

Nang bandang huli, nagkasakit nang malubha ang anak na lalaki ng biyuda hanggang sa tumigil ang kanyang paghinga. Binuhat siya ni Elias paakyat at dumaing sa Panginoon, "Muling buhayin Mo po ang batang ito!" Dininig ng Panginoon si Elias, at nabuhay muli ang bata. Dinala siya ni Elias sa kanyang ina at sinabi, "Tingnan mo, buhay ang iyong anak." Sinabi ng babae, "Ngayon, alam ko nang ikaw ay lingkod ng Diyos, at ang salita ng Panginoon sa iyong bibig ay totoo."