Mwana Aliyerudi Nyumbani

Yesu alisimulia hadithi ya baba aliyekuwa na wana wawili. Siku moja mwana mdogo akasema, "Baba, nipe sasa sehemu yangu ya kila kitu." Basi baba akagawanya alivyokuwa navyo kati ya wanawe. Kisha mwana mdogo akakusanya vitu vyake vyote, akaenda nchi ya mbali.

Huko akazitapanya fedha zake zote kwa maisha ya anasa. Kisha njaa kubwa ikaingia nchi ile, naye hakubakiwa na kitu. Akapata kazi ya kulisha nguruwe. Alikuwa na njaa sana hata akatamani kula chakula cha nguruwe. Lakini hakuna mtu aliyempa kitu.

Hatimaye akazingatia moyoni mwake. Akawaza, "Wafanyakazi wa baba yangu wana mkate tele, na mimi hapa ninakufa kwa njaa! Nitaondoka niende kwa baba yangu. Nitasema, Baba, nimetenda dhambi. Sistahili kuitwa mwanao. Niruhusu nikufanyie kazi badala yake."

Basi akaondoka, akaenda nyumbani. Lakini alipokuwa angali mbali, baba yake alimwona. Moyo wa baba ukajaa upendo. Akamkimbilia mwanawe, akamkumbatia, akambusu.

Mwana akaanza, "Baba, nimetenda dhambi. Sistahili kuitwa mwanao." Lakini baba akawaita watumishi wake. "Leteni vazi lililo bora kabisa! Mvisheni pete mkononi na viatu miguuni! Fanyeni karamu, tufurahi. Mwanangu alikuwa amepotea, na sasa ameonekana!"

Ndugu mkubwa alikasirika, hakutaka kuingia ndani. Baba akatoka nje kumwendea, akasema, "Mwanangu, wewe u pamoja nami siku zote, na vyote nilivyo navyo ni vyako. Lakini ilitupasa kufurahi. Ndugu yako alikuwa amepotea, naye ameonekana."