Ruthu Anabaki Mwaminifu

Hapo zamani hapakuwa na chakula katika nchi ya Israeli, basi Naomi na jamaa yake wakahamia nchi ya Moabu. Huko mumewe akafa. Wanawe wawili wakaoa wanawake wa Moabu, walioitwa Orpa na Ruthu. Kisha, kwa huzuni, wana wote wawili wakafa pia. Sasa Naomi akabaki peke yake pamoja na Orpa na Ruthu.

Naomi akasikia kwamba Mungu amewapa watu wake mkate tena, basi akaanza safari ya kurudi nyumbani, Bethlehemu. Akawaambia Orpa na Ruthu, "Rudini nyumbani kwa mama zenu." Wakalia. Orpa akambusu, akarudi. Lakini Ruthu akamshikilia sana.

Ruthu akasema, "Utakakokwenda, nitakwenda. Utakapokaa, nitakaa. Watu wako watakuwa watu wangu, na Mungu wako atakuwa Mungu wangu." Basi wote wawili wakafika Bethlehemu pamoja, wakati mavuno ya shayiri yalipokuwa yakianza.

Ruthu akaenda shambani kuokota masalio ya nafaka, ili yeye na Naomi wapate kula. Shamba lilikuwa la mtu mwema aliyeitwa Boazi. Alikuwa mwema kwa Ruthu. "Kaa shambani mwangu," akasema. "Kunywa maji yangu, na ule mkate pamoja na wafanyakazi wangu." Alikuwa amesikia jinsi Ruthu alivyomtunza Naomi. Hata aliwaambia wafanyakazi wake waangushe nafaka za ziada makusudi, kwa ajili yake.

Boazi alikuwa wa jamaa ya Naomi, na katika Israeli ndugu wa karibu angeweza kuwatunza wajane kama Naomi na Ruthu. Ruthu akamwomba Boazi awe msaidizi huyo, naye Boazi akakubali kwa furaha. Akamwoa Ruthu.

Mungu akawapa Ruthu na Boazi mtoto wa kiume aliyeitwa Obedi. Naomi akambeba mikononi mwake, na majirani zake wakasema, "Ahimidiwe BWANA!" Obedi alipokua, akawa babu wa Mfalme Daudi.