Danieli na Simba

Danieli aliishi mbali na nyumbani kwake Yuda, naye alimtumikia Mfalme Dario. Alikuwa mwenye hekima na mwaminifu sana hata mfalme akapanga kumweka juu ya ufalme wote.

Viongozi wengine walimwonea wivu, lakini hawakuweza kumpata Danieli kosa hata moja. Basi wakatengeneza mtego. Wakamwambia mfalme, "Weka sheria: kwa siku thelathini mtu yeyote asimwombe mungu wala mtu yeyote isipokuwa wewe, ee mfalme, la sivyo atupwe katika tundu la simba." Mfalme Dario akaitia sahihi sheria hiyo, nayo isingeweza kubadilishwa.

Danieli alijua kuhusu sheria hiyo. Lakini alikwenda nyumbani, akafungua madirisha yake kuelekea Yerusalemu, akamwomba Mungu wake mara tatu kwa siku, akishukuru, kama alivyokuwa akifanya siku zote.

Watu wale wakamwona akiomba, wakamwambia mfalme. Dario akahuzunika sana, akajaribu mchana kutwa kumwokoa Danieli, lakini sheria isingeweza kubadilishwa. Danieli akatupwa katika tundu la simba. Mfalme akasema, "Mungu wako, unayemtumikia siku zote — yeye atakuokoa." Jiwe kubwa likawekwa juu ya tundu.

Usiku ule mfalme hakuweza kula wala kulala. Alfajiri na mapema akaenda haraka tunduni, akaita, "Danieli! Je, Mungu wako aliweza kukuokoa na simba?" Danieli akajibu, "Ee mfalme, uishi milele! Mungu wangu alimtuma malaika wake, akavifunga vinywa vya simba. Hawakunidhuru."

Mfalme akafurahi sana. Danieli akatolewa nje bila jeraha hata moja, kwa sababu alimtumaini Mungu wake. Watu waliotengeneza mtego wakatupwa kwa simba badala yake. Kisha Mfalme Dario akaandika kwa ulimwengu wote: "Mungu wa Danieli ni Mungu aliye hai. Yeye huponya na kuokoa."