Kuvuka Bahari ya Shamu

Watu wa Mungu, Israeli, walikuwa watumwa Misri kwa muda mrefu sana. Sasa Mungu alikuwa akiwaongoza kutoka huko. Mchana nguzo ndefu ya wingu iliwatangulia, na usiku nguzo ya moto iliwapa mwanga. Mungu hakuiondoa kamwe.

Lakini Farao, mfalme wa Misri, alibadili mawazo yake. "Kwa nini tumewaachia Israeli waende?" akasema. Akachukua magari ya vita mia sita na jeshi lake lote, akawafuatia.

Israeli walikuwa wamepiga kambi kando ya Bahari ya Shamu. Watu walipowaona Wamisri wanakuja, waliogopa sana, wakalia. Lakini Musa akasema, "Msiogope. Simameni tuli, mkaone jinsi BWANA atakavyowaokoa leo. BWANA atawapigania."

Mungu akamwambia Musa, "Inua fimbo yako, unyooshe mkono wako juu ya bahari." Musa akafanya hivyo. Usiku kucha Mungu akatuma upepo mkali wa mashariki, na bahari ikafunguka! Watu wa Israeli wakapita katikati juu ya nchi kavu, maji yakiwa yamesimama kama ukuta upande wao wa kuume na wa kushoto.

Wamisri wakawafuatia moja kwa moja ndani ya bahari. Lakini Mungu akayafanya magurudumu ya magari yao ya vita yatoke, hata wakashindwa kuendesha. Kisha Musa akaunyoosha mkono wake tena, na maji yakarudi kwa nguvu. Yakalifunika jeshi lote la Farao. Hakuna hata mmoja wao aliyebaki.

Hivyo BWANA akawaokoa Israeli siku ile. Watu walipoliona jambo kuu Mungu alilolifanya, wakamwamini BWANA na Musa mtumishi wake.